Nun sois asturianos, sois babayos

Daquién falaba fai unos díes d’un nuevu movimientu cultural –otros, más intelixentemente– si asina podemos nomalo, basáu nel aburrimientu, nel gris y nel bocexu. N’Asturies tamos viviendo díes prietos como’l carbón, una nueva edá media na que nos funden los políticos a los que yos dimos el votu porque “diben facer muncho por Asturies” y “Cascos barrió muncho pa casa cuando yera ministru”. Tan adormeciéndonos con productos culturales fedientos, nun paren de recortar en tó lo que ye verdaderamente importante pa nós, y agora, de sópitu, llego-y el turnu al meyor festival cinematográficu de la península.

Nun se m’esmolez la primera vez que ví una pellícula de la Denis, foi L’Intrus nel teatru Jovellanos, sola y cuando salí ya atapeciera. Alcórdome de cuando saludé a Todd Solondz pola cai Menéndez Valdés, perdíu como una pita’n la nieve. Lo que tal me reí con Adam & Paul y cómo dempués perseguimos a Abrahamson pa decí-y que nos encantexara’l so trabayu. De Larry Clark fechu una llaceria ensin cambiase de ropa en una semana. Del momentu lisérgicu na Escalerona dempués de Me and You and Everyone We Know. De odiar Luz silenciosa y aplaudir a Tsukamoto. De venir xentuca estranxera a descubrime el Cantares. Nun teo un recuerdu muy vivu pero la mio tiesta asoció Xixón con buen cine dende que de guaja me llevaben a ver daqué en Enfants Terribles. Crecí con esi tipu de cine y el festival formome como espectadora, cinéfila, crítica y persona.

Perdonaime pola urxencia y pol mio asturianu, dame vergoña pero nunca deprendí asturianu normativu nin pude estudiar la mio llingua, más que nel pueblu y na escuela colloriando cuentinos. Nel institutu matriculábame tolos años, pero yeren necesarios al menos nueve alumnos más nun institutu de seis grupos por cursu –un de los más importantes de Xixón– asina que imposible. Dempués emigré.

Esti nuevu grupu políticu tenta amenorgar a los asturianistas a base de coloca-yos cartelinos perguapos escritos n’asturianu nos espacios públicos. Además, a partir de güey todos contentos: el recién nomáu director diz que quier defender el “cine de casa”, facer una “gala de Asturias” y asina contentos tamién los asturianos de palu que nun s’enteren de ná. Nun-yos gusta que pensemos y por ello van ponenos muncho 3D, animación, pellícules de Garci, alfombra vermella y van inspirase en Málaga o San Sebastián. El cine tien que ser políticu y batallante o nun selo. Nun tá bien rebaxar el nivel artísticu-cultural en époques de desesperu y desencantu.